SUDHAKAR YENDLURI ఎండ్లూరి సుధాకర్

జాషువా

2011-03-11T11:08:00.000-08:00

ఇచ్చోటనే కదా !

నీ చక్కని విగ్రహం

ముక్కలై పోయింది

నీ విగ్రహమే కాదు

కారల్ మార్క్స్ బొమ్మని కూల గొట్టి

కాలు పెట్టిన వాడి కాళ్ళకు

అమెరికా నమస్కరించినట్టుంది

గబ్బిలాన్ని పట్టుకుని రెక్కలు విరిచి

ముక్కలు చేసినట్టుంది

నువ్వు వినుకొండలో ఉండకుండా

ట్యాంకు బండు దాకా ఎందుకొచ్చావు?

రోమ్ లాంటి నగరం

తగల బడటానికే తప్ప

తల దాచుకోవటానికి కాదు

నగరం లో రాతి విగ్రహమై

'నవయుగ కవి చక్రవర్తి' వై

సగర్వంగా జీవిస్తున్నావనుకున్నాను

దిక్కులేకుండా దీనంగా

దెబ్బతింటావనుకోలేదు

నీ 'ఫిరదౌసి' బతికుంటే

కంట నీరు పెట్టుకుని

మసీదు గోడల మీద కాదు

ఉస్మానియా విశ్వ విద్యాలయ కుడ్యాల మీద

విషాద పద్యాలు రాసి ఉండేవాడు

నిన్ను కూల గొట్టిన కులీను డెవడో

కుల హీనుడెవడో

తెలిసినవాడే

తెలుగు వాడే అయ్యుంటాడు

ప్రజల నాల్కల మీద

పట్టం కట్టుకున్న పాదుషా!

అభిమానుల గుండెల్లో

ఆకాశమంత పద్యమై నిలిచిన

నీ అక్షర రూపాన్ని ఎవడు కూలగొట్ట గలడు?

వంద గొంతులు పిసికి

వందన సమర్పణ చేసే వాడెవడో

నీ మీద చెయ్యి చేసుకుని ఉంటాడు

వెయ్యేళ్ళ తెలుగు సాహిత్యపు

ఏకైక దళిత ప్రతినిధివైన నీ మీద

దానయ్య ఎవడో దాడి చేసి ఉంటాడు

వీళ్ళేం చేస్తున్నారో

వీళ్ళకు తెలియదు కనక

విశ్వ నరుడా !

వీళ్ళను క్షమించు

రాలింది రాతి ముక్క మాత్రమే

బాధ పడకు జాషువా !

బంగారు విగ్రహం పెట్టే రోజొస్తుంది.

- ఎండ్లూరి సుధాకర్

(10.3.2011 నాడు, హైదరాబాదు ట్యాంకు బండు మీద 'కవికోకిల గుర్రం జాషువా' విగ్రహం కూలగొట్టిన

నేపధ్యం లో ...)

దీపావళి రుబాయిలు

2010-11-27T06:36:00.000-08:00

వరాన్వేషణ

2010-10-04T09:31:00.000-07:00

ప్రవరాఖ్యుడు కాకపోయినా
ఫరవా లేదనిపించాలి
కుబేరుడు కాకపోయినా
నగలను కుదవబెట్టనివాడు కావాలి
సత్యవంతుడు కాకపోయినా
నిత్య సంతోషితుడూ
మా అమ్మాయికి హితుడు, సన్నిహితుడు కావాలి

మోహించేవాడే తప్ప
దహించేవాడక్కరలేదు
ముఖాన్ని ముద్దులాడాలి కానీ
మొహం మీద యాసిడ్ పోసేవాడు వద్దు
పంచభక్ష్యాలు పెట్టకపోయినా
కంచంలో ముద్దల్ని కలిపి పెట్టేవాడు కావాలి
కాకరకాయ కూరనైనా
కళ్లకద్దుకుని తినే తీపి మనసువాడు కావాలి

నడివీధిలో విడిచే బండజాతివాడు కాదు
గుండెల్లో దాచుకునే దయ్రార్దహృదయుడు కావాలి
తేనీటిని కన్నీటిని చెరిసగంగా
పంచుకునే రాజహంస కావాలి
మంటల్లో తగలబెట్టేవాడు కాదు
మా అమ్మాయి వెన్నెల విరహాగ్నిని చల్లబరిచేవాడు కావాలి

ఎప్పుడూ డబ్బు లెక్కపెట్టేవాడు కాదు
అప్పుడప్పుడు ఆరుబయట
మల్లెపూల కళ్లతో నక్షత్రాలు గుణించేవాడు కావాలి
కొంచెం సంగీతం తెలియాలి
ఇంకొంచెం సాహిత్యం చదవాలి
మా అమ్మాయి ప్రతి సమయాన్ని రసమయం చేయాలి

ఎప్పుడైనా
మా అమ్మాయి ఎడమకాలితో తన్నినా
ఏమీ అనుకోని సరసుడు కావాలి
ఏడడుగుల బంధంతో ఏడిపించేవాడు కాదు
ఎప్పుడూ నవ్వించే స్నేహితుడు కావాలి
అబ్రహాము శారాల్లా
అపురూప దంపతుల్లా ఉండాలి
ఒక జీవితకాలం తోడుగా నిలవాలి

మా అమ్మాయితో కలసి జీవించేవాడే కాదు
నవ్వుతూ నరకానికైనా వెళ్లేవాడు కావాలి
మా అమ్మాయిని ముంతాజ్‌లా చూసుకోకపోయినా
అనార్కలీలా సజీవ సమాధి చేయనివాడు కావాలి
పిడికిట తలంబ్రాలు పట్టేవాడే తప్ప
కత్తులు కటారులు పట్టే కసాయి కాకూడదు
ధారణాయంత్ర ధురీణుడు కాకపోయినా
సాధారణ ఉద్యోగియైనా అభ్యంతరం లేదు
అమెరికా వాడో
ఐరోపావాడో అక్కర్లేదు
తెలుగువాడైతే చాలు
మీ దృష్టిలో ఎవరైనా ఉంటే
మా అమ్మాయికి సరిపడే
వరుణ్ణి వెతికి తెస్తారా
వంద వచన కవితల సంపుటి అంకితమిస్తాను
ఇన్ని మాటలెందుకుగానీ
మా అమ్మాయిని భరించే మంచి బకరా కావాలి

- ఎండ్లూరి సుధాకర్
ఆదివారం ఆంధ్ర జ్యోతి అనుబంధం 3 .10 .2010

'ప్రాచీన సంస్కృత,తెలుగు,హిందీ సాహిత్యంలో మహిళా సాధికారత-తులనాత్మక అధ్యయనం'- UGC జాతీయ సదస్సు.VSM college,రామచంద్రాపురం. తూ. గో . జిల్లా.27,28thseptember,2010.

2010-09-28T20:49:00.000-07:00

తెలుగు రుబాయీలు

2010-09-16T20:32:00.000-07:00

*ఉత్తరం అందగానే హృదయం కంపించింది
అక్షరమక్షరం లో ఆమె రూపు కనిపించింది
మేఘంలా ఆమె ముందు వాలిపోయి వసీరా!
జల్లు జల్లుగా కురవాలని అనిపించింది.

*ఇన్నాళ్ళకు చూసినందుకేమో ఏడుపు ఆగటం లేదు
వెళ్లి పలకరిద్దామంటే అడుగు సాగటం లేదు
ఊరుకో బేల హృదయమా ! ఊరుకో
ఎంత కప్పి పెడుతున్నా గాయం దాగటం లేదు .

*ఒకేసారి ఇద్దరిని కట్టుకున్నాడు
ఇద్దరికీ తెలియకుండా తృతీయను పెట్టుకున్నాడు
కొమ్మలిద్దరు మొగుణ్ణి కోర్టుకీడ్చితే
గొల్లుమంటూ తల గోడకేసి కొట్టుకున్నాడు .

*కలిసి చచ్చి పోదామంది కలికి
పడ్డాడు ప్రియుడు అదాటున ఉలికి
నీకూ నీ ప్రేమకూ నమస్కారం ప్రియ మణీ!
బ్రతుకు జీవుడా !అన్నాడు శుభం పలికి .

-ఎండ్లూరి సుధాకర్

తెలుగు రుబాయీలు

2010-09-11T23:45:00.000-07:00

*సదా నా హృదయం నిన్నే స్మరిస్తోంది
నీ జ్ఞాపకాల దీపంతో చీకట్లో చరిస్తోంది
తొలినాటి తీపి వలపు తొలగిపోదు నేస్తమా!
నిన్ను తలచుకున్నప్పుడల్లా నా జన్మ తరిస్తోంది .

*మినుములతో ఆ మిటారి మిద్దె మీదికొచ్చింది
వస్తూ వస్తూ వెంట పీట కూడా తెచ్చింది
ఆమె పీటనైనా కాకపోతినేనని
ఉన్న పళంగా దుఃఖం తన్నుకొచ్చింది .

*ఒక్క ముద్దు కోసం యుగాలైనా ఆగుతాను
ఆమె పొందు కోసం యోజనాలు సాగుతాను
మూడు ముళ్ళు పడితేనే సుఖం కదా సుధాకర్!
అంత వరకు విరహం లో వీణనై మోగుతాను.

*ఆమె నా కళ్ళల్లో కళ్ళు పెట్టి చూసింది
పూర్తిగా తగిలేలా పూల బాణం వేసింది
మత్తు దిగి చూస్తే ఏముంది మహెజబీన్?
పెళ్లి పంజరం లో వెచ్చగా పడవేసింది.

-ఎండ్లూరి సుధాకర్
నవ్య, సెప్టెంబర్ 1 , 2010

తెలుగు రుబాయీలు

2010-06-19T11:39:00.000-07:00

plz click on article to see comfortable...

ఇంటర్వ్యూ

2010-01-27T05:46:00.000-08:00

ఒక చలి కాలపు రాత్రి ...

2009-12-24T03:18:00.000-08:00

24.12.2009,సాక్షి దిన పత్రిక నుంచి....

నజరానా {ఉర్దూ కవితలు}

2009-05-27T00:00:00.000-07:00

*పనిగట్టుకొని ఆమె చిత్రపటాన్ని
పది మందికీ చూపించాను
ప్రతి ఒక్కడితో ఇప్పుడు
పగను కొని తెచ్చుకున్నాను
-ఆజాద్

*నీకు చాలా దూరంలో ఉన్నాను
నీ మీదే మనసు పెట్టుకున్నాను
నీ చిరునామా దొరికినా దొరక్కపోయినా
నీ కోసం మాత్రం నీరీక్షిస్తూనే ఉంటాను
-వహషత్ కలకత్తవీ

*మనసుతో చెప్పే వాణ్ని
అలాంటి బాటలో నడవద్దని
ఎదురు దెబ్బలుతిని పడింది
అనుకున్నాను తగిన శాస్తి జరిగిందని
-అష్రఫ్ రాహాబ్

తెలుగు అనువాదం :ఎండ్లూరి సుధాకర్

నజరానా!(ఉర్దూ కవితలు)

2009-04-22T02:58:00.000-07:00

*ఇవాళ హృదయాన్ని

దివాళా తీసి కూర్చున్నాను

కొంత సంతోషమూ దొరికింది

కొంత దు:ఖమూ మిగిలింది

-జిగర్

*అందరూ నాకే చెబుతారు

బుద్ధిగా తలొంచుకుని నడవాలని

ఆమెకెందుకు చెప్పరు మరి ?

ముస్తాబై మా బస్తీలోకి రావద్దని

- అక్బర్ ఇలాహాబాదీ

*కలుసుకుందాం అనే మాట

అలవోకగా అనేసింది

ఎక్కడ? అని అనేసరికి

'కలలో' అంటూ కదిలిపోయింది

-అమీర్ మీనాయీ

*సిగ్గులొలుకుతూ

నా సన్నిధిలో తాను

ఆమె దగ్గరున్నంత సేపూ

నేను నేనులో లేను

- జిగర్

*నా పేరు ఆమె కళ్ళల్లో

భద్రంగా రాసి వుంది

బహుశా ఏ కన్నీరో

దాన్ని చెరిపేసి ఉంటుంది

-బషీర్ బద్ర్

*కాశ్మీరు పూలమీద

మంచు బిందువులు నర్తిస్తున్నాయి

మరి ఎక్కడ నుండి

ఈ రక్తపు చినుకులు వర్షిస్తున్నాయి?

-రఫిక్ గిరిధర్ పురీ

తెలుగు అనువాదం:డా:సుధాకర్ ఎండ్లూరి

నజరానా!(ఉర్దూ కవితలు)

2009-04-05T08:24:00.000-07:00

*నువ్వే రానప్పుడు

నీ ఊహలతో పనేంటనీ

దయతో వాటికి చెప్పవూ

వచ్చే శ్రమ తీసుకో వద్దనీ.

-జిగర్ మురాదా బాదీ

*ఉదయ సంధ్య వేళ

మధువు పుచ్చుకుంటున్నాను

మతాధిపతీ! నన్నాపొద్దు

ఉపాసన కోసం ఆత్మను సిద్ధం చేస్తున్నాను.

-ఆదమ్‌

*ఆ భోగినీ విలాసం చూడండి

హృదయ తాపం రగిలించి

చూపులు కలపకుండానే చెక్కేసింది

ముసి ముసి నవ్వులు కురిపించి .....

-జిగర్ మురాదాబాదీ

అనువాదం: ఎండ్లూరి సుధాకర్ ,( వర్ణ చిత్రం లో -జిగర్ మురాదా బాదీ )

నజరానా(ఉర్దూ కవితలు)

2009-03-20T04:25:00.000-07:00

*బతుకంతా నీ కోసం

పరితపిస్తూ జీవించా

ఎదురు చూపులు చూస్తూ

ఎందరినో ప్రేమించా

-హఫీజ్ హొషియార్ పురీ

*ఆకులకీ గడ్డి పరకలకీ

అవగతమే నా దుస్థితి

తోటకంతా తెలుసు గానీ

తెలియందల్లా పూలకే నా గతి

_ మీర్ తకీ మీర్

*నా కన్నీటి కబురు

ఆమె చెవిదాకా ఎవరు చేర్చారు?

నా గుండె గుట్టు నలుగురిలో

ఎవరు సుమా రచ్చకీడ్చారు ?

_నాతిక్ గులావఠీ

తెలుగు అనువాదం :డా.ఎండ్లూరి సుధాకర్

దు:ఖ గంధకికామ్ల వర్షం

2009-03-06T10:11:00.000-08:00

ఈ మధ్య గమనిస్తున్నాను

మా అమ్మాయిలు అదోలా ఉంటున్నారు

భద్రంగా ఉన్నట్టులేరు

ఏ యువకుడు కనబడినా

ఏ వాహన శబ్దం వినబడినా

ఊరికే ఉలిక్కి పడుతున్నారు

పులిని చూసిన జింకల్లా బెదిరిపోతున్నారు

బజారుకెళ్లాలంటే భయపడుతున్నారు

కాలేజీ కెళ్లమంటే కంగారు పడుతున్నారు

కారణాలడిగితే కన్నీటి మేఘాలౌతున్నారు

ఆకాశం ప్రతిధ్వనించేలా నవ్విన వాళ్లు

గలగల గోదారిలా మాట్లాడిన వాళ్లు

నీరింకిన చలమలౌతున్నారు

మేత ముట్టని దూడల్లా

మెత్తబడుతున్నారు

ఏ దిగులు తీగలకో చిక్కుకొని

పగలూ రాత్రీ కునారిల్లుతున్నారు

రోజుకు నాలుగు సార్లు

బండితీసి చక్కర్లు కొట్టేవాళ్లు

స్నేహితుల్ని వెనకెక్కించుకొని

వీథుల్ని వీర విహారం చేసేవాళ్లు

రెండు పదుల వయసొచ్చినా

మా కంటికి రెండేళ్ల పిల్లల్లాగే కనిపిస్తారు

యవ్వనపు టెన్నిస్ కోర్టులో

సానియా మీర్జాలా

దర్జాగా ఆడుకుంటూ కనిపిస్తారు

ఇప్పుడు పెద్దగా బైటికెళ్లడం లేదు

ఇంటిపట్టునే ఉండిపోతున్నారు

వార్తలు చూస్తే చాలు

వణికి పోతున్నారు

కాలిన గొంతులు వినబడితే

కంటతడి పెడుతున్నారు

మా అమ్మాయిల్ని చూస్తే

మహా బెంగగా ఉంది

అమ్మా! ఏం కావాలో చెప్పండి

మీకేం తేవాలో అడగండని

గుచ్చి గుచ్చి ఆరాతీస్తే

గుడ్లల్లో నీళ్లు గుక్కుకుంటూ

ఇలా అన్నారు.

"నాన్నా!

మాకు యాసిడ్ ప్రూఫ్ ముఖాలు కావాలి

తెచ్చిపెట్టగలవా?!...''

-ఎండ్లూరి సుధాకర్

నజరానా (ఉర్దూ కవితలు)-5

2009-02-21T05:00:00.000-08:00

*మొత్తం ఆ వీధికంతా
నా ఒక్క కొంప లోనే దీపం లేంది
ఆ చీకటే చాలు నీకు
నా చిరునామా చెప్పేస్తుంది.

- బాకీ అహమద్ పురీ

*తెల్లారిపోయినా ఆ కొవ్వొత్తి
ఇంకా ఏడుస్తుంది దేనికని ?
"ఇంకొద్దిగా మిగిలాను
ఇది కూడా కరిగిపోవాలని"

-ఆగ్ జాన్‌ 'ఏష్ '

*ఆమె నగ్నసౌందర్యం మీద
పరుచుకున్నాయి కురులు
ఒకే సారి ఉదయించాయి
రేయీ మరియూ పవలూ

- హీరాలాల్ పలక్

*'మనసు ఎలా వుంటోందని '
ఆమె నవ్వుతూ అడిగింది
ఒక కన్నీటి చుక్క దొరలి
అలా నిలిచి పోయింది.

-మహిరూల్ కాదరీ

*ఎలాగైతేనేం? ఆమె కళ్ళు
అశ్రు బిందువులు వర్షించాయి
ఆమె చిరు నవ్వుల బరువు కూడా
ఆ నయనాలు మోయలేక పోయాయి

-ఖామోష్

*వెన్నెలని చూసుకునే కదా
చంద్ర బింబం మిడిసి పడుతోంది
ప్రియా! ఒక్క సారి
నీ ముసుగు తీస్తే నిజం తెలుస్తుంది .

-సాహిల్ మానక్ పురీ

-తెలుగు అనువాదం :ఎండ్లూరి సుదాకర్

నజరానా(ఉర్దూ కవితలు)-4

2009-02-09T02:16:00.000-08:00

*నేను అనుకునే వాణ్ణి

ప్రేమంటే ఫ్రణయ కలాపం

ఆ తరువాత తెలిసింది

అది ఒక రుధిర విలాపం .

-అసర్ లఖ్నవీ

*చాలా అందమైనవి నీ కళ్ళు

తెల్లవార్లూ మేలుకోకు

సహజ నిద్ర పడుతుందిలే

నా ఆలోచన రానీయకు .

_హసన్‌ కాజ్మీ

*ఈడ్చుకొని వెళ్ళింది

మనసు నీ దగ్గరికి

ఏం చెప్పాలో చెప్పు ?

అది చేసిన పిచ్చి పనికి .

_ రషీద్ సిద్ధిఖీ

*హాయిగా ఏడ్చుకునే

స్వేచ్ఛ కావాలి ఫానీ

ఇది ఆమె వుండే వీధి

తెలుసుకో !నీ దు:ఖశాల కాదని .

_ఫానీ

*బహుశా వైద్యంతోనైనా

కుదురుకుంటుందేమో చావు

కానీ జీవితాన్ని మాత్రం

బాగు చేసే మందులేవీ లేవు.

_ఫిరాఖ్

*నా పేరు నేల మీద రాసి

మళ్ళీ చెరిపేసింది

ఆమెకది ఒక ఆట

కడకదే నన్ను మట్టి పాలు చేసింది.

-నవాజ్ మహల్ అఖ్తర్

-తెలుగు అనువాదం :ఎండ్లూరి సుధాకర్

చెరువు లేని ఊరు

2009-02-07T03:43:00.000-08:00

అమ్మ లేని అనాధలా

మా ఊరికి చెరువు లేదు

చిన్నప్పుడు

చెరువు చెక్కిళ్ళని ముద్దు పెట్టుకున్న

నీటి జ్ఞాపకాలు కానీ

నీటి మైదానంలో దిసమొలతో

పరుగెత్తిన గాఢ స్మృతులు కానీ

జల వృక్షమెక్కి అలల ఆకుల నడుమ

పిందెలా కదిలిన బాల్య్యానుభూతులు కానీ లేవు.

చెరువు పలక మీద

జలాక్షరాలు దిద్దుకోవాలని

చిన్నప్పుడు ఎంత పలవరించామో

మబ్బుల ఊరేగింపు బయలుదేరినప్పుడల్లా

ఉరుములతో గొంతు కలిపి

ఆరు బయట నీటి నినాదాలు చేసేవాళ్ళం .

జలజలా రాలే తొలకరి చినుకుల్ని

మట్టి నాల్కలు చాపి

పిప్పరమెంటు బిళ్ళళ్లా చప్పరించే

చెరువు మా బాల్య జలస్వప్నం

ఆకాశం కొలిమిగా మారిన అగ్ని రుతువులో

ఒక చెరువు కోసం

ఒక చెలమ కోసం

బొబ్బలెక్కిన కాళ్ళతో కాందిశీకులమయ్యే వాళ్లం

బెత్తికలెత్తి దూపగొన్న మా బతుకులకు

గుక్కెడు మంచినీళ్ళు కూడాదొరికేవికావు

మా గురయ్య తాత కళ్ల గుంటల్లా

'రెండు ' దిగుడుబావులు మాత్రం

దిగులు దిగులుగా కనబడుతుండేవి

ఆకాశం వైపు చేతులు మోడ్చి

మాకో చెరువునియ్యమని ప్రార్ధించాం

భగీరధులమై జలాగ్రహం చేశాం .

ఆకాశం లోకి విల్లు సారించి

మేఘ భాండాల్ని బద్దలు చేయాలనుకున్నాం

రోళ్ళకి కప్పలు కట్టి నీటి పూజలు చేస్తే

వర్షం పడుతుందనుకునే వెర్రి బాల్యం మాది.

ఎప్పుడైనా వర్షమొచ్చిన పొద్దు

మా వూరు జల ప్రవాహపు జాతరవుతుంది .

మళ్లీ మరునాటికి బురద మొహంతో నెర్రలు తీస్తుంది.

ఒకే ఒక్క కుంభవర్షపు తుఫాను రాత్రి

నిజంగానే మా వూరు చెరువయ్యింది.

గుడిసెల మెడల దాకా వూరు మునిగినా

చెరువు ఉయ్యాల లో తేలుతూ

మా కడుపుల్ని చెరువు చేసుకున్నాం .

నిండు నీటిలో మేమంతా

తాబేళ్ళమయ్యాం

కొరమీనులమయ్యాం

చందమామ బేడిస చేపలమయ్యాం

నెమ్మది నెమ్మదిగా చెరువెండిపోతుంటే

అమ్మ దగ్గర పాలైపోయినట్టు మూగ వోయాం

మా వూరు గుర్తుకొచ్చి

నా బాల్యం వీపు నిమిరినప్పుడల్లా

నా తాతముత్తాతల నాటి

మెట్ట పొలం కళ్ళల్లో కదిలినప్పుడల్లా

చెరువు లేని నా పల్లె రూపం

నన్ను నిలువెల్లా నీరు గా మార్చేస్తుంది.

నన్ను చెరువుగా మారమని

మట్టి గొంతుతో నినదిస్తూ వుంటుంది.

-ఎండ్లూరి సుధాకర్

(వర్తమానం నుంచి)

నజరానా!(ఉర్దూ కవితలు )-3

2009-01-31T03:10:00.000-08:00

*ఆమె నా శవయాత్ర నాపి

నిలదీసింది ఇలా!

'నిన్ను మా వీధిలోకి రావద్దన్నాను గానీ

ఈ లోకాన్ని విడిచిపోతే ఎలా?'

-సఫీ

*నా నుంచి శాశ్వతంగా

విడిపోదామనుకుంటున్నావా నువ్వు?

గుర్తుగానైనా ఉండిపోతుంది

వెళ్ళే ముందు నాకో గాయాన్నివ్వు.

-నూర్ ఇందౌరీ

*ఆమె గుర్తుకురాగానే

అలముకున్నాయి అశ్రువులు

జ్ఞాపకాలకెంత దగ్గరో కదా

ఈ కన్నీటి బిందువులు.

-అంజుమ్

*ఆమె తలపుల తన్మయత్వం

నన్ను విడిచి పోదు

తరలిపో మరణమా!

నాకిప్పుడు తీరిక లేదు.

-అజ్ఞాత కవి

*కొందరి సుందరాంగుల చిత్రాలు

మరి కొన్ని వలపుటుత్తరాలు

నేను మరణించాక

ఇవే నా గదిలో దొరికే వస్తువులు.

-గాలిబ్

*ప్రియతమా! ఏం చెప్పను?

నా కన్నీటి బిందువుల తీరు

నిల బడితే నిప్పు

ఒలికి పడితే నీరు .

-ఫానీ బదాయినీ

-తెలుగు అనువాదం: ఎండ్లూరి సుధాకర్

నజరానా ! (ఉర్దూ కవితలు)-2

2009-01-29T03:46:00.000-08:00

*ఎంత పదిలంగా చూసుకున్నా

నా హృదయం నాది కాలేకపోయింది

ఒక్క నీ ఓర చూపు తోనే

అది నీ వశమైపోయింది .

-జిగర్ మురాదాబాదీ

*ఎదురు చూపులకైనా

ఓ హద్దంటూ ఉంటుంది

కడకు వెన్నెల కూడా

కరకుటెండలా మారుతోంది.

-బిస్మాల్ సయూదీ

*ఆమె నా ప్రేమ లేఖ చదివి

అది ఇచ్చిన వాడితో ఇలా అంది

'ఈ జాబుకు బదులివ్వక పోవడమే

నా జవాబ'ని చెప్పింది.

-అమీర్ మీనాయీ

*తనని చూడగోరే వారికి

తరుణం లభించింది

ఆమె తన మేలి ముసుగు

అర మోడ్పుగా తొలగించింది

-అర్ష్ మల్సియాని

*నా కెవరైనా ఎరుక పర్చండి

ఆమెకెందుకు జవాబు చెప్పాలని?

ఆమె నన్ను అడుగుతోంది

'తనని ఎందుకు కోరుకున్నాన'ని ?

- షకీల్ బదాయునీ

*వలపు దారిలో అలసి పోయి

ఎక్కడ నేను చతికిలబడ్డానో

అక్కడ నాకంటే ముందే వచ్చిన

బాటసారుల్ని చూశానెందరినో

- బహదూర్ షా జఫర్

అనువాదం : ఎండ్లూరి సుధాకర్

నాలుగు నల్ల కవితలు

2009-01-20T09:53:00.000-08:00

౧

నల్లవాడా!

నల్లవాడలోని పిల్ల వాడా

నీలి వజ్రాల నిగనిగల కళ్ళ వాడా!

ఘెట్టోలలో - చీకటి

కొట్టాలలో

బానిస బంధాలలో

గాఢాందకారాలలో

శతాబ్దాలు మగ్గిన వాడా

పోరు చేసి నెగ్గిన వాడా

నిగ్గరుగా

బిగ్గరుగా

పిలవబడిన వాడా

నల్ల రేగడి పోర గాడా

ఏ నాటికైనా

అమెరికాను శాసిస్తావు

బహుశా నువ్వే

శాశ్వతంగా పరిపాలిస్తావు.

*ఘెట్టో - మన వెలి వాడ వంటిది

౨

నీలీ!

పింఛా లాంఛిత

అసిత కిరణ రింఛోళీ

నడిచే నా నల్లకలువల దండా!

నిన్ను నిగ్గర్

అన్నవాడే బెగ్గర్

డార్కీ

నీ అందం

నల్ల సముద్రం మీద

లేత చంద్రోదయం ...

*రింఛోళీ -సమూహం

౩

ఎవరన్నారో గానీ

ఈ వైట్ హౌస్ కి

బ్లాక్ పెయింట్ వేస్తే

భలేగుంటుంది

ఏ నల్లని వాడో

పద్మనయనమ్ముల వాడో

అధ్యక్షుడిగా కూర్చుంటే

ఆనందంగా వుంటుంది

అమెరికన్ డాలర్ మీద

నీలి గాయకుడు

పాల్ రాబ్సన్ బొమ్మ వేస్తే

అర్ధవంతంగా వుంటుంది

౪

ఒబామా!

తెల్లపుట్టను

చీల్చి పుట్టిన

నల్ల నాగుబామా!

కవుల స్వప్నం నిజం చేసిన

నల్ల సార్వభౌమా !

నమస్కార మందుకో

ఓ నీలి చందమామా!

-ఎండ్లూరి సుధాకర్

(పై మూడు కవితలు 2002 సం.లో 'ఆటా 'ఆహ్వానం పై అమెరికా వెళ్ళినప్పుడు అక్కడ ఆశువుగా చెప్పిన కవితలు )

తెలుగు రుబాయీలు

2009-01-19T01:01:00.000-08:00

వాకపల్లి ఘోరానికి సిగ్గే లేదు

దుర్మార్గుల నేరానికి ఎగ్గే లేదు

జాతికింత అవమానం జరుగుతు వున్నా

జనం లో రగులుతున్న అగ్గే లేదు .

ఆడవాళ్ళ చట్టాలను కాపాడాలి

ఇరుగు పొరుగు వారికొరకు పోరాడాలి

దెబ్బతినే దేశమాత దేహం చూసి

దేవుడైన ఆమె వైపు నిలబడాలి .

భయం వేస్తున్నదమ్మా భైంసా

మధ్య యుగాల నాటి మత హింస

గుండె బాదుకుంటూ అరుస్తోంది

గూడు కాలిన నల్లహంస.

రాతి దేవుళ్ళకు నమస్కరిస్తాడు

బాబాలను బహుగా సత్కరిస్తాడు

యాచకులెవరైనా 'అయ్యా' అంటే

ఛీ పొమ్మని ఆ భక్తుడు ఛీత్కరిస్తాడు.

కాపీ కొట్టిందని ఎగబడి పట్టుకున్నారు

కళాశాల పరువు తీసిందని కసిగా తిట్టుకున్నారు

ఈ కార్పొరేట్ కంసులంతా కలిసి

బంగారం లాంటి బాలికను పొట్టన పెట్టుకున్నారు .

ఆమె మొదట్లో ఒక పువ్వనుకున్నాను

ఏమీ తెలియని గూటి గువ్వనుకున్నాను

మైకు ముందు నిలబడ్డాకే తెలిసింది

ఆమె నిజంగా ఒక నిప్పు రవ్వనుకున్నాను.

-ఎండ్లూరి సుధాకర్

నజరానా(ఉర్దూ కవితలు)

2009-01-15T23:30:00.000-08:00

నిన్నొకసారి చూస్తే చాలు

ఆ కళ్ళు అలా మూసుకుపోతాయి

ఒక్కసారి నీ రూపాన్ని చూశాక

ఇంకా అవి దేన్ని చూస్తాయి

-వహషత్ కలకత్తవీ

జీవితంలో అందరూ ప్రేమిస్తారు

ప్రాణేశ్వరీ !మరణించినా నిన్నేస్మరిస్తుంటాను

నిన్నొక ఊపిరిలా గుండెల్లో పదిలపరిచాను

నిన్ను అదృష్ట రేఖల్లోంచి దొంగిలించాను.

-ఖతీల్ షిఫాయీ

నేనూ మౌనంగా వున్నాను

తానూ నిశ్శబ్దంగా వుంది

ఒక నాజూకు విషయమేదో

మా మధ్యన నలుగుతోంది

-ముల్లా

నా కనీళ్ళని నేను

చప్పరిస్తున్నా కూడా

లోకమంటోంది ఇలా

"వీడు తాగుబోతు గాడా"?

-నరేష్ కుమార్ 'షాద్'

నీ ప్రతి ఓర చూపూ

నిజంగా అది నాకు

ఒక బాణం ఒక ఖడ్గం

ఒకప్పుడది పిడి బాకు

-సాజన్ పెషావరీ

సర్వేశ్వరా!నువ్వు సృష్ఠించిన

సుందరాంగుల్ని చూస్తే ఇలా అనిపిస్తుంది

ఏ ముఖాన్ని చూసినా వెంటనే

హృదయానికి హత్తుకోవాలనుంటుంది

-అక్బర్ ఇలాహాబాదీ

తెలుగు అనువాదం:డా.ఎండ్లూరి సుధాకర్

తొలి తెలుగు ఎయిడ్స్ కవితలు -2

2008-11-24T06:44:00.000-08:00

పులి రాజు ఊరి మీద పడితే

నెల రాజుకైనా ఎయిడ్స్ వస్తుంది

పులికి వాతలు పెట్టండి

ఆడ వాళ్ళంటే

హడలి చస్తుంది

***********

మనుషుల్ని కుట్టడానికి దోమలు భయపడుతున్నాయి

ఎయిడ్స్ గుర్తుకొచ్చి గజ గజా వణుకుతూ రొదపెడుతున్నాయి

ఇంత చెప్పినా సిగ్గు రాని జంటలు

నడి చీకట్లో 'అడ్డు' లేకుండా కలుసుకుంటున్నాయి

*********

ముసి ముసి నవ్వులతో మురిపించింది

అడుగడుగున వలపు వాన కురిపించింది

హెచ్చైవీ లక్షణాలు కనబడగానే

నరకానికి ద్వారాలు తెరిపించింది

***********

ఎండ్లూరి సుధాకర్

తొలి తెలుగు ఎయిడ్స్ కవితలు -1

2008-11-24T05:16:00.000-08:00

రంభ పిలిచినా సరే

రాజీ పడకండి

తొడుగు లేకుండా

అడుగు వేయకండి

తొందర పడ్డారా !

పాడె నవ్వుతుంది

బూడిద రువ్వుతుంది

*********

మన్మధుడు ఎయిడ్స్ వ్యాధి తో మంచమెక్కాడు

రతీ దేవి సెక్స్ వర్కరై రోడ్డున పడింది

ప్రబంధ కాలం కాదు

దుర్గంధ కాలం దాపురించింది

*********

ఎయిడ్స్ ని ద్వేషిద్దాం

హెచ్చైవి పేషెంటుని ప్రేమిద్దాం

బతికినంత కాలం

బాగా చూసుకుందాం

ఒకే జననం

ఒకే మరణం

మనిషే మన శరణం

********

-ఎండ్లూరి సుధాకర్

స్వర పరికరం

2008-11-23T05:04:00.000-08:00

మౌన బాల్యానికి వాడొక ప్రతీక

తన చిన్ని ప్రపంచాన్ని ఒంటరి గా చప్పరిస్తూ

శృతి పేటిక పై ఊగుతూనో

హార్మోనియం రెక్క లాగుతూనో

నిదుర పోగుల్ని లోలోపల ముడి వేసుకుంటూ

విసన కర్రలా అటూ ఇటూ జోగుతూ

రే పగళ్ళ తాడు మీద స్వర ప్రస్తారం చేస్తుంటాడు

రాత్రి ముహూర్తాలు ఆకలిని మంట కలుపుతాయి

సైనికుని టెలిగ్రాం లా హడావుడి ప్రయాణం

దూర దూరాలకు చేరుకోక తప్పదు

భుజానికి స్కూలు సంచీలా

మెడలో సుతి పెట్టె

చినిగిన చొక్కా నిక్కరుతో

చిన్న పంచె ముక్కతో

ముడి వేసిన జుట్టుతో

నిలువు బొట్టుతో

పెండ్లి మేళంలో వృద్ధ బాలుడిలా కనిపిస్తాడు

చిగురు పాదాల మీద కాయలు కాచిన గుర్తులు

ఎండిన జొన్న రొట్టెలాంటి బుగ్గల మీద

పేరుకుపోయిన దు:ఖపు చారికలు

పిల్లలంతా కేరింతల ఆకాశం మీద

రంగు రంగుల గాలి పటాలై తేలిపోతుంటే

వాడు దిగులు బొంగరమై

తనలో తనే తిరుగుతుంటాడు .

-ఎండ్లూరి సుధాకర్

విడిచి వచ్చిన పేగు

2008-11-20T07:35:00.000-08:00

విమానం లో

కూర్చున్న తల్లికి

కూటి కోసం

కూలి పనికెళ్లే రోజులు

గుర్తొచ్చాయి

కన్న పేగులు

కంటి తీగలై

తడి రెప్పల మీద పాకుతున్నాయి.

దుఃఖాన్ని

దూలానికి కట్టెయ్యలేము

దూరాన్ని దోసిళ్లలో తెచ్చుకోలేము.

వలస పోయిన

డాలరు దూడల కోసం

ఆవులాంటి అమ్మకు

కన్ను మూసినా

తెరచినా

మనసు మాత్రంకొట్టం చుట్టూ తిరుగుతూనే ఉంటుంది

గడ్డిమోపు కాదు కదా!

నెత్తిన పెట్టుకొని రావటానికి

పచ్చబొట్టు కాదు కదా!

మణి కట్టుమీద పొడిపించుకొని తేవడానికి

నా కొడుకు

చిన్నప్పుడు చెట్టుకు కట్టిన ఉయ్యాలలో

చింత చిగురులా ఊగుతూ ఉంటే

ఏ చింతా లేకుండా ఉండేది

నా కూతురు

కొంగు కొమ్మకు వేలాడుతూ ఉంటే

ఎంత భద్రంగా ఉండేది.

కొడుకా జాగ్రత్త

బిడ్డా పదిలం తల్లీ

దేశం కాని దేశంలో

దుర్మార్గుల ద్వేషంలో

తుపాకులతో జాగ్రత్త

తూటాలతో జాగ్రత్త

-ఎండ్లూరి సుధాకర్

varthamanam(the presentence time)

2008-11-15T04:33:00.000-08:00

I can't talk now about my nation.

my country ia a Sakuntala

Delivered of and forgotten.

I'am a refugee bird in my land.

I'm one shedding tears between swords and horns

I'm not a millionaire hood.

On tens and thousands of hoods,

I stand as a bubble.

It's me every piece of the mirror being broken.

I can't walk fearless between any two men.

I can't live in peace between any two Gods.
Between two languages -my conversation snubbed.

Between two rivers -union of waters prohibited.

I stuck the national flag

On my chest.

Listening to lessons of history

In my childhood class

I preserved the flower of my country

In my school bag.

Bags touched-bombs blast now

Hearts moved-fires hiss.

Now this nation like a black boar frightens me

With it's lust for blood.

This country- aquestion paper with no key

They send word to Siddhartha having cut the wings of swans.

Here, the state it self shoots ,yet rewards the dead.

Inaugurates flower gardens ,yet prohibits fragrences

Stifling the throat of the nation ,broadcasts the anthem

Some where down the well a frogling is croaking.

Some mad cap of poet is

Singing MERA BHATRTH MAHAN in a dreams meet.

News papers carry the soaked blood all night.

Some VISWAMITHRA is laying the foundation stone

For a heaven neither here nor there.

Some one is administering anaesthesia to BHARATHA MAATHA

Some body is leaving me among

Mechines alienating me.

I'm searching for my mother land

With an iron stove on hea

And a blanket of sorrow

I'am going for my mother's breast.

If i'm not reborn

Crusifing,nailing, crowning my self

Resurrecting in the land of expiration,

I'm in eligible to live in this land.

If i can't sing in the chorus

My song is a crime now.

I don't intend to sing the

Lines with which I don't agree.

I don't wish to see the men in my nation

As devine or sage like.

I wish to see the sheen of clusters of clouds

In men as either

Bunches of shrubs smelling sweet

Or as perennial rivers spreading wavelets.

I dream of the nature's beauty at dawn

Shattering demonic darkness to pieces.

I don't like even an ant to be alone.

I can't bear even a puppy dying of hunger.

I tune on my dream KANJIRA new songs.

Standing on live coal I intone the truth.

I look for a new season

Of an uninfected man-tree.

A dream on behalf of a million eyes

Of the present, a new nation.

by

YENDLURI SUDHAKAR(telugu)1992
' MO'(english)