తెలుగు రుబాయీలు

*సదా  నా  హృదయం  నిన్నే  స్మరిస్తోంది
నీ జ్ఞాపకాల దీపంతో చీకట్లో చరిస్తోంది
తొలినాటి తీపి వలపు  తొలగిపోదు నేస్తమా!
నిన్ను  తలచుకున్నప్పుడల్లా  నా జన్మ తరిస్తోంది .

*మినుములతో ఆ మిటారి  మిద్దె మీదికొచ్చింది
వస్తూ వస్తూ వెంట పీట కూడా తెచ్చింది
ఆమె పీటనైనా కాకపోతినేనని
ఉన్న పళంగా దుఃఖం తన్నుకొచ్చింది .

*ఒక్క ముద్దు కోసం యుగాలైనా ఆగుతాను
ఆమె పొందు కోసం యోజనాలు సాగుతాను
మూడు ముళ్ళు పడితేనే సుఖం కదా సుధాకర్!
అంత వరకు విరహం లో వీణనై మోగుతాను.

*ఆమె నా కళ్ళల్లో కళ్ళు పెట్టి చూసింది
పూర్తిగా తగిలేలా పూల బాణం వేసింది
మత్తు దిగి చూస్తే ఏముంది మహెజబీన్?
పెళ్లి పంజరం లో వెచ్చగా పడవేసింది.


-ఎండ్లూరి సుధాకర్
నవ్య, సెప్టెంబర్ 1 , 2010