*ఆమె నా శవయాత్ర నాపి
నిలదీసింది ఇలా!
'నిన్ను మా వీధిలోకి రావద్దన్నాను గానీ
ఈ లోకాన్ని విడిచిపోతే ఎలా?'
-సఫీ
*నా నుంచి శాశ్వతంగా
విడిపోదామనుకుంటున్నావా నువ్వు?
గుర్తుగానైనా ఉండిపోతుంది
వెళ్ళే ముందు నాకో గాయాన్నివ్వు.
-నూర్ ఇందౌరీ
*ఆమె గుర్తుకురాగానే
అలముకున్నాయి అశ్రువులు
జ్ఞాపకాలకెంత దగ్గరో కదా
ఈ కన్నీటి బిందువులు.
-అంజుమ్
*ఆమె తలపుల తన్మయత్వం
నన్ను విడిచి పోదు
తరలిపో మరణమా!
నాకిప్పుడు తీరిక లేదు.
-అజ్ఞాత కవి
*కొందరి సుందరాంగుల చిత్రాలు
మరి కొన్ని వలపుటుత్తరాలు
నేను మరణించాక
ఇవే నా గదిలో దొరికే వస్తువులు.
-గాలిబ్
*ప్రియతమా! ఏం చెప్పను?
నా కన్నీటి బిందువుల తీరు
నిల బడితే నిప్పు
ఒలికి పడితే నీరు .
-ఫానీ బదాయినీ
-తెలుగు అనువాదం: ఎండ్లూరి సుధాకర్
